Mkongwe wa Arsenal, Ian Wright amedai kuwa Arsene Wenger amemwambia kuwa anakaribia kuachana na kazi ya kuifundisha timu hiyo.
Mkataba wa Wenger mwishoni mwa msimu huu na bado hajasaini mkataba mpya na alikataa kuzungumzia maisha yake ya baadaye klabuni hapo.
Wright alikutana na Wenger juzi na alionekana kuchoka, akibainisha kwamba Mfaransa huyo ameonyesha kila dalili kuwa ataachia ngazi baada ya kuinoa miamba hiyo kwa miaka 21.
Akizungumza na BBC Radio 5Live Ijumaa usiku, Wright alisema: “Nilikuwa na kocha (Wenger) jana usiku na kama natakiwa kusema ukweli, nimeona dalili kwamba nadhani natakiwa kumwamini alichoniambia.
“Nilikuwa nae kwa saa chache usiku, tulizungumza na kiukweli hakuniambia moja kwa moja kama ‘naondoka mwishoni mwa msimu’. Nimeona dalili tu, kwamba kama aliyechoka hivi.
“Alichoniambia moja kwa moja ni kwamba anaelekea ukingoni mwa kazi yake. Sikjawahi kumsikia akisema hivyo kabla.”
Wenger na Wright walikuwa katika hafla ya Q&A kwenye Uwanja wa Emirates Alhamisi usiku kabla ya mchezo wao wa jana wa ushindi wa mabao 2-0 dhidi ya Hull City.
Kocha huyo wa Arsenal amekuwa katika presha ya mashabiki wanaomtaka ajiuzulu kutokana na kufungwa mara mbili mfululizo dhidi ya Watford na Chelsea, kitu kilichoathiri mipango yao ya ubingwa msimu huu.
Kushindwa kwa Wenger kutwaa taji la Ligi Kuu England tangu 2004 kumewafanya mashabiki wamshambulie kwa maneno, huku wengine wakibeba mabango yenye ujumbe wa kumtaka aachie ngazi, walipofungwa kwenye Uwanja wa Stamford Bridge wiki iliyopita.
Akiwa na miaka 67 sasa, kocha huyo Mfaransa ndiye mkubwa zaidi na kocha mwenye muda mrefu katika klabu moja kuliko wote wa Ligi Kuu England.
Anaonekana amechoka,” aliongeza Wright, wakati akiwa katika kipindi juzi alipoulizwa juu ya majaliwa ya Wenger.
Post a Comment